ఊరు పేర్లతో తమాషా వాక్యాలు..!!

రేడియో అన్నయ్య గా పేరుకెక్కిన న్యాయపతి రాఘవరావుగారు ’బాల’ అనే పిల్లల మాస పత్రిక నడిపేవారు. దానిలో కొన్నిశీర్షికలు తమాషాగా ఉండేవి. దానిలో ఒకటి ఈ క్రింద వ్రాయబోయేది.

ఏదో ఒక వాక్యం ఇచ్చి దానిలో దాగి ఉన్న ఊరుపేరు చెప్పాలి.

ఉదా.              భోజన భీమ..! డోలు వాయించక..!!                             భీమడోలు

           హాత్ కాకి..! నా డబ్బా ఎత్తుకుపోయింది.                       కాకినాడ

ఇవి రెండూ చిన్నప్పుడు ’బాల’ లోనే చదివాను. మిగతావి ఏవీ గుర్తులేవు. పోనీ కొత్తగా ఏవైనా పుట్టిద్దామని కొంచం ప్రయత్నిస్తే ఈ క్రింది వాక్యాలు వచ్చాయి:

• కడపటి వార్తలందే సమయానికి ఇండియా స్కోరు మూడువందలు దాటింది..!            
• ఏదీ..! అమలా…!! పురందర దాసు కీర్తన ఒకటి పాడు..!!!                                  
• నేను చెప్పిన మాట విను..! కొండమీదకు నడిచి వెళ్ళి మొక్కు చెల్లించుకో..!             
• భలేవాడివి హనుమ..! కొండ మీద మూలికలు తెమ్మంటే కొండనే మోసుకొచ్చేశావే..!       
• మాన్యం లెక్క చెప్పకుండా ఇష్టం వచ్చినట్టు మింగెయ్యడానికి ఈ దేవుడి గుడి వాడబ్బసొమ్మేం కాదు..!
• పార్వతి, పురంధేశ్వరి ఒకే ఈడు వాళ్ళు.                                                         
• శమంతకమణి ఆమెతండ్రికి సూర్యుడిచ్చిన వరం..! గల్ గల్  మంటూ అదెక్కడుంటే అక్కడ ధనలక్ష్మి నాట్యమాడుతోంది.
• నీకు ఏది కావాలో అది మదిలో కోరు..! కొండ మీద వెలసిన అమ్మోరి మీద భారం వదులు..!! 
• వినాయక చవితి రోజున గరిక (గడ్డి) తో చేసే పూజ కి చాలా ప్రాశస్త్యం ఉంది. 
• శ్రీశైల పుణ్య క్షేత్రంలో జరిగే అన్ని ఉత్సవాలు  అక్కడి చెంచులకు చాలా ప్రత్యేకం. అందుకని గిరి పుత్ర్రులు వారి సంప్రదాయ నృత్యాలతో స్వామిని సేవిస్తారు. 
• ఆ గ్రామంలో గట్టిగా ఇరవై గడపలు కూడా లేవు.                                              
• అరిగిపోయిన రికార్డులా హోరు పెట్టేబదులూ చెప్పదలచుకున్నదేదో సూటిగా చెప్పరాదూ..!! 
• Elephant’s Husband City (ఇది మా అమ్మగారు చెప్పారు) జవాబు: గజపతినగరం 

 పై వాక్యాలలో ఊరుపేర్లు చెప్పుకోవాలి. చాలా సులువుగా చెప్పెయ్యగలరు. జవాబులు వేరేగా వ్రాయవలసిన  అవసరం ఉందనుకోను. ఎవరికైనా తెలియకపోతే అప్పుడు చెప్తాను.